போதைப்பொருள் கடத்தல்: இந்தோனேசியருக்கு ஆயுள் தண்டனை, 12 கசையடிகள் உறுதி

புத்ராஜெயா: 549.68 கிராம் மெத்தாம்பேட்டமைன் போதைப்பொருள் கடத்திய இந்தோனேசிய நாட்டவர் ஒருவருக்கு விதிக்கப்பட்ட ஆயுள் தண்டனை மற்றும் 12 கசையடிகளை மேல்முறையீட்டு நீதிமன்றம் இன்று உறுதி செய்தது.

நீதிபதி டத்தோ அசிசுல் அஸ்மி அட்னான் தலைமையில், டத்தோ நூரின் பதருடின் மற்றும் டத்தோ முகமட் ராட்ஸி அப்துல் ஹமீட் ஆகியோர் அடங்கிய மூன்று நீதிபதிகள் கொண்ட அமர்வு, முகமது சுல்பிகார் சுபியாண்டி கஸ்மின் செய்த மேல்முறையீட்டை ஒருமனதாக தள்ளுபடி செய்து, உயர் நீதிமன்றத்தின் தீர்ப்பை நிலைநிறுத்தியது.

போதைப்பொருள் தடயத்தை விசாரணை அதிகாரி, வேதியியலாளரிடம் ஒப்படைத்த நேரத்தில் முரண்பாடுகள் இருந்ததாகக் கூறப்படும் தற்காப்புத் தரப்பின் வாதம், சம்பந்தப்பட்ட சாட்சியிடம் குறுக்கு விசாரணையின் போது ஒருபோதும் எழுப்பப்படவில்லை என்று நீதிபதி அசிசுல் கூறினார்.

ஒரு வழக்கின் முக்கிய அம்சம் குறித்து சாட்சியை குறுக்கு விசாரணை செய்யத் தவறியது, அந்த சாட்சியின் சான்றை ஏற்றுக் கொண்டதாகக் கருதப்படும் என்ற பொதுவான கொள்கை உள்ளது என்று அவர் மேலும் குறிப்பிட்டார்.

மேல்முறையீட்டாளர் தடுத்து வைக்கப்பட்ட சூழ்நிலைகள் மற்றும் தடைசெய்யப்பட்ட பொருள் எவ்வாறு பெறப்பட்டது என்பதை உறுதிப்படுத்த விசாரணை அதிகாரி தவறியது அரசுத் தரப்பு வழக்கைப் பாதிக்கவில்லை என்றும் அவர் குறிப்பிட்டார்.

26 வயதான சுல்பிகார், மெத்தாம்பேட்டமைன் கடத்திய குற்றத்திற்காக ஜொகூர் பாரு உயர் நீதிமன்றத்தால் ஜூலை 28, 2024 அன்று ஆயுள் தண்டனை மற்றும் 12 கசையடிகளுக்கு ஆளானார். இந்தக்குற்றம் டிசம்பர் 18, 2019 அன்று இரவு 7.30 மணியளவில், ஜொகூரில் உள்ள குкуп் லவுட், கம்போங் நெலயான் ஆயர் மாசின் நுழைவாயிலில் நிகழ்ந்ததாகக் குற்றம் சாட்டப்பட்டது.

வழக்கின் உண்மைகளின்படி, பொந்தியான் மாவட்ட காவல்துறை தலைமையகத்தைச் (IPD) சேர்ந்த ஒரு குழுவினர், கிராமத்தின் நுழைவாயிலுக்கு அருகே சந்தேகத்திற்கிடமாக நடந்துகொண்ட ஒருவரைக் கண்டனர். மார்பில் சிலிங் பை ஒன்றை அவர் அணிந்திருந்தார்.

பின்னர் குற்றவாளி என அடையாளம் காணப்பட்ட அவர் தடுத்து நிறுத்தப்பட்டு சோதனையிடப் பட்டார். அவரது பையைச் சோதனையிட்டதில், “refined Chinese tea” என லேபிளிடப் பட்ட மஞ்சள் நிற பிளாஸ்டிக்கில் சுற்றப்பட்டிருந்த வெளிப்படையான பிளாஸ்டிக் பொட்டலம் ஒன்று கண்டுபிடிக்கப்பட்டது. அதில் போதைப்பொருள் என நம்பப்படும் வெள்ளை படிகத் தூள் இருந்தது.

மேல்முறையீட்டு விசாரணையின் போது, சுல்பிகாரின் வழக்கறிஞர் ஹோ ஸி கியான், போதைப்பொருள் தடயங்களின் சான்று சங்கிலியில் ஒரு இடைவெளி இருந்ததை உயர் நீதிமன்ற நீதிபதி தீர்மானிக்க தவறிவிட்டார் என்றும், இது சட்டம் மற்றும் உண்மைகளின் அடிப்படையில் ஒரு பிழை என்றும் வாதிட்டார்.

அரசுத் தரப்பு  சாட்சியத்தின் அடிப்படையில், போதைப்பொருள் தடயங்களை ஒப்படைத்தது மற்றும் பெற்றது தொடர்பான பதிவுகளில் முரண்பாடுகள் இருந்ததாகவும், இது மேல்முறையீட்டாளருக்கு எதிரான வழக்கை பாதித்ததாகவும் அவர் கூறினார்.

இருப்பினும், துணை அரசு வழக்கறிஞர் முகமட் ஜைன் இப்ராஹிம் இதனை மறுத்தார். போதைப்பொருள் தடயம் தொடர்பான சான்று சங்கிலியில், அதாவது காவல்துறையினரால் பறிமுதல் செய்யப்பட்டது முதல், பகுப்பாய்வு செய்யப்பட்டு, நீதிமன்றத்தில் அதிகாரப்பூர்வமாக சான்றாக சமர்ப்பிக்கப்பட்டது வரை எந்த இடைவெளியும் இல்லை என்று அவர் கூறினார்.

சாட்சிகளின் சாட்சியம் மற்றும் வேதியியல் பகுப்பாய்வு அறிக்கை மூலம் போதைப் பொருளின் வகை மற்றும் எடையை அரசுத் தரப்பு வெற்றிகரமாக நிரூபித்துள்ளதாக உயர் நீதிமன்றம் கண்டறிந்ததாகவும், வேதியியலாளரின் கண்டுபிடிப்புகளின் நம்பகத்தன்மையை அல்லது துல்லியத்தை சவால் செய்ய தற்காப்புத் தரப்பு எந்த ஆதாரத்தையும் சமர்ப்பிக்கவில்லை என்றும் அவர் குறிப்பிட்டார்.

சுல்பிகாருக்கு இன்னும் கூட்டரசு நீதிமன்றத்தில் மேல்முறையீடு செய்ய ஒரு வாய்ப்பு உள்ளது.