ஷா ஆலாம், மார்ச் 6: சிப்பாங் நகராட்சி மன்றம் தனது நிர்வாகத்தை வலுப்படுத்தவும், சேவை வழங்கலில் வெளிப்படைத்தன்மையை அதிகரிக்கவும், கடந்த பிப்ரவரி 1-ஆம் தேதி முதல் ‘iPMS’ எனப்படும் ஸ்மார்ட் கொள்முதல் மேலாண்மை அமைப்பின் மூலம் அனைத்து கொள்முதல் நடவடிக்கைகளையும் முழுமையாக இணையவழியில் செயல்படுத்தி வருகிறது.
நகராட்சி மன்றத்தின் தலைவர் டாக்டர் அனி அகமது கூறுகையில், இந்த அமைப்பு ஒப்பந்ததாரர்கள் மற்றும் விநியோகஸ்தர்களுக்கான முதன்மை மையமாகச் செயல்படுவதோடு, தரவுகளை மையப்படுத்தப்பட்ட முறையில் நிர்வகிக்கவும் பதிவுச் செயல்பாடுகளை எளிதாக்கவும் உதவுகிறது என்றார்.
கொள்முதல் தொடர்பான அனைத்து விவகாரங்களும் டிஜிட்டல் முறையில் பதிவு செய்யப்பட்டு கண்காணிக்கப்படுவதால், தவறான புரிதல்கள் மற்றும் குளறுபடிகள் குறையும் என்றும், இது சிறந்த நிர்வாகம் மற்றும் பொறுப்புக்கூறலுக்கான நகராட்சியின் அர்ப்பணிப்பை வெளிப்படுத்துகிறது என்றும் அவர் குறிப்பிட்டார்.
கடந்த ஜனவரி 28-ஆம் தேதி அறிமுகப்படுத்தப்பட்ட இந்த அமைப்பின் மூலம், ஒப்பந்ததாரர்கள் மற்றும் விநியோகஸ்தர்கள் தங்களின் ஏல ஆவணங்களை அல்லது டெண்டர்களை டெண்டர் பெட்டிகளில் போட வேண்டிய அவசியமின்றி, விரைவாகவும் திறமையாகவும் சமர்ப்பிக்க முடியும். மேலும், கொள்முதல் கூட்டம் நடைபெற்ற 24 மணி நேரத்திற்குள் ஒப்பந்ததாரர் அல்லது விநியோகஸ்தர் குறித்த முடிவுகளை இணையவழியில் அறிந்துகொள்ள முடியும் என்பதால், தணிக்கை செயல்முறைகள் எளிமையாக்கப்பட்டு நிர்வாகத்தில் வெளிப்படைத்தன்மை அதிகரித்துள்ளது.
பிப்ரவரி 1-ஆம் தேதி முதல் அனைத்து கொள்முதல் விவகாரங்களும் இந்த அமைப்பின் வழியாகவே நடைபெறுவதால், அனைத்து ஒப்பந்ததாரர்களும் விநியோகஸ்தர்களும் இந்த அமைப்பைப் பயன்படுத்துவது கட்டாயமாக்கப்பட்டுள்ளது. அவர்கள் https://ipms.mpsepang.gov.my என்ற இணையதளத்தில் பதிவு செய்து கொள்ளலாம். பிப்ரவரி 13-ஆம் தேதி வரை, சாலை சீரமைப்பு, வடிகால் பழுதுபார்ப்பு மற்றும் தளவாடங்கள் விநியோகம் போன்ற 14 பணிகள் இந்த அமைப்பின் வாயிலாக விளம்பரப்படுத்தப்பட்டுள்ளன.
சிலாங்கூர் மாநில அரசு, பொதுச் சேவைகளின் திறனை மேம்படுத்தவும் மக்களின் விவகாரங்களை எளிதாக்கவும் இந்த ஆண்டு முதல் மாநிலத்திலுள்ள அனைத்து உள்ளூராட்சி மன்றங்களிலும் இத்தகைய மாற்றத்தைச் செயல்படுத்தவுள்ளதாக மந்திரி புசார் டத்தோஸ்ரீ அமிருடின் ஷாரி முன்னதாகத் தெரிவித்திருந்தார்.
