புத்ராஜெயா, பிப் 27: மலேசிய எல்லைக் கட்டுப்பாடு மற்றும் பாதுகாப்பு முகமையின் இயக்குநர் ஜெனரல் டத்தோ ஸ்ரீ முகமட் ஷுஹைலி முகமட் ஜைன் தொடர்பான ஒரு காணொளி மற்றும் '@Haily Only Official' என்ற பெயரில் இயங்கும் டிக் டாக் கணக்கு ஆகியவையும் போலியானவை என்று அந்த முகமை உறுதிப்படுத்தியுள்ளது.
இன்று வெளியிட்டுள்ள அறிக்கையில், நவீன 'டீப்ஃபேக்' (Deepfake) தொழில்நுட்பத்தைப் பயன்படுத்தி அந்த வீடியோ சிதைக்கப்பட்டுள்ளதாகவும், அது அந்த முகமையின் அதிகாரப்பூர்வ அறிக்கை போன்ற தவறான பிம்பத்தை உருவாக்குவதாகவும் AKPS தெரிவித்துள்ளது.
மேலும், இயக்குநர் ஜெனரலின் பெயர், புகைப்படம் மற்றும் வீடியோக்களைப் பயன்படுத்தி அவரது பெயரில் பல அங்கீகரிக்கப்படாத சமூக ஊடகக் கணக்குகள் தனிப்பட்ட லாபத்திற்காகவும் விளம்பரத்திற்காகவும் செயல்பட்டு வருவதை அந்த முகமை கண்டறிந்துள்ளது.
இத்தகைய சட்டவிரோதச் செயல்களில் ஈடுபடும் நபர்கள் அல்லது தரப்பினர் மீது எவ்வித சமரசமும் இன்றி கடுமையான சட்ட நடவடிக்கை எடுக்கப்படும் என்று AKPS எச்சரித்துள்ளது.
பொதுமக்கள் இத்தகைய போலியான பதிவுகளை நம்பி ஏமாற வேண்டாம் என்றும், துல்லியமான மற்றும் சரிபார்க்கப்பட்ட தகவல்களுக்கு AKPS-இன் அதிகாரப்பூர்வ தகவல் தொடர்பு பக்கங்களை மட்டுமே நாடுமாறும் அறிவுறுத்தப்பட்டுள்ளது.