கோலா திரங்கானு, 13 ஜனவரி: சமூக வலைதளங்களில் பகுதிநேர வேலை வாய்ப்பு என்ற பெயரில் ஏமாற்றப்பட்டு, ஓய்வு பெற்ற வங்கி அதிகாரி ஒருவர் RM91,550 இழந்துள்ளார்.
கடந்த ஜனவரி 5-ஆம் தேதி, 57 வயதான அந்தப் பாதிக்கப்பட்ட நபர், முகநூலில் விற்பனை முகவருக்கான வேலை வாய்ப்பு விளம்பரத்தைப் பார்த்துள்ளார் என்று கோலா திரங்கானு மாவட்ட காவல்துறைத் தலைவர் ஏசிபி அஸ்லி முகமட் நூர் கூறினார்.
அந்த விளம்பரத்திற்கு ஆர்வம் காட்டிய அவர், கொடுக்கப்பட்டிருந்த இணைப்பை அழுத்தியவுடன், சந்தேக நபரால் வாட்ஸ்அப் செய்தி அனுப்பப்பட்டதாக அவர் கூறினார்.
"பாதிக்கப்பட்டவர் 'AurionVilla' எனும் வாட்ஸ்அப் குழுவில் சேர்க்கப்பட்டு, ஒரு இணைய தளம் மூலம் ஹோட்டல் முன்பதிவு செய்யும் பணிகளை எவ்வாறு முடிக்க வேண்டும் என்பது குறித்து விரிவான விளக்கம் அளிக்கப்பட்டது. ஒரு உறுப்பினராக அல்லது பணியாளராகப் பதிவு செய்த பிறகு, அவர் தனது சொந்தப் பணத்தைப் பயன்படுத்தி ஒரு நாளைக்கு 90 ஹோட்டல் முன்பதிவுகளைச் செய்ய வேண்டும் என்றும், ஒவ்வொரு பணிக்கும் கமிஷன் வழங்கப்படும் என்றும் உறுதியளிக்கப்பட்டது," என்று அவர் இன்று வெளியிட்ட அறிக்கையில் தெரிவித்துள்ளார்.
சில பணிகளை முடித்த பிறகு RM4,000 லாபம் ஈட்டியதால், பாதிக்கப்பட்டவர் தொடக்கத்தில் மிகவும் மகிழ்ச்சியடைந்ததாக அஸ்லி கூறினார். "அதிக நம்பிக்கையின் காரணமாக, பெரிய லாபத்தைப் பெறுவதற்காக அவர் அதிக அளவிலான முன்பதிவுகளைச் செய்துள்ளார். இருப்பினும், வாக்குறுதி அளித்தபடி லாபம் கிடைக்காததால், நேற்று மதியம் 1.39 மணியளவில் அவர் போலீசில் புகார் அளித்தார்," என்று அவர் கூறினார்.
இந்த வழக்கு குற்றவியல் சட்டத்தின் 420-வது பிரிவின் கீழ் விசாரிக்கப்பட்டு வருகிறது.
