ஷா ஆலம், டிச 18- காஜாங் நகராட்சி மன்ற நிர்வாகம் மற்றும் சமூகப் பிரச்சனைகள் குறித்த முக்கிய ஆலோசனைக் கூட்டம் இன்று காலையில் நடைபெற்றது.
காஜாங் சட்டமன்ற உறுப்பினர் மாண்புமிகு சியோங் கியான் யோங், காஜாங் நகராட்சி மன்றத்தின் (MPKj) தலைவர் மேதகு துவான் நஸ்லி பின் முகமட் தாயிப் மற்றும் தொடர்புடைய துறை இயக்குநர்களுடன் சிலாங்கூர் மாநில மனிதவளம் மற்றும் வறுமை ஒழிப்பு ஆட்சிக்குழு உறுப்பினர் மாண்புமிகு பாப்பாராய்டு வீரமான் ஒரு முக்கிய சந்திப்பை மேற்கொண்டார்.
காஜாங் நகராட்சி மன்றத்தின் நிர்வாக எல்லைக்குட்பட்ட பகுதிகளில் நிலவும் பல்வேறு பிரச்சனைகள் குறித்து விவாதிப்பதற்கே இந்த ஆலோசனைக் கூட்டம் ஏற்பாடு செய்யப்பட்டிருந்தது.
குறிப்பாக, உள்ளூர்வாசிகளின் நலன் மற்றும் ஊராட்சி மன்றங்களின் மேலாண்மை தொடர்பான விவகாரங்களை ஆய்வு செய்து ஒருங்கிணைப்பதில் இச்சந்திப்பு கவனம் செலுத்தியது.இந்த ஆலோசனைக் கூட்டத்தில் மிக முக்கியமான ஒரு விஷயமாக, உலு லங்காட் மாவட்டம், செராஸ் முக்கிம், தாமான் கோப்பரேசி கியூபெக்ஸ் / தாமான் டேசா பாரு பகுதியில் அமைந்துள்ள ஸ்ரீ மகா மாரியம்மன் ஆலய நில விவகாரம் குறித்து விரிவாக விவாதிக்கப்பட்டது.
ஆலய நிலத்தின் தற்போதைய அந்தஸ்து, அதன் மேலாண்மை மற்றும் இப்பிரச்சனைக்கு இணக்கமான முறையில் தீர்வு காண்பதற்கான வழிமுறைகள் குறித்து அதிகாரிகள் ஆலோசித்தனர். அனைத்துத் தரப்பினரும் ஏற்கும் வகையிலான ஒரு நாகரீகமான தீர்வை எட்டுவதே இதன் முக்கிய நோக்கமாகும்.மாநில அரசு, மக்கள் பிரதிநிதிகள் மற்றும் உள்ளூர் அதிகார அமைப்பு ஆகியவற்றுக்கு இடையே நெருக்கமான ஒத்துழைப்பு இருக்க வேண்டியதன் அவசியத்தை இச்சந்திப்பின் போது அதிகாரிகள் வலியுறுத்தினர்.
மேலும், உள்ளூர் மக்களின் உணர்வுகளுக்கு மதிப்பளித்து, சமூக நல்லிணக்கத்தையும் அனைவரின் நலனையும் உறுதி செய்யும் வகையில் இணக்கமான முறையில் தீர்வுகள் எட்டப்பட வேண்டும் என்பதும் இந்த ஆலோசனைக் கூட்டத்தில் உறுதி செய்யப்பட்டது என்று பாப்பாராய்டு வீரமான் தெரிவித்தார்.
