ஷா ஆலம், 14 நவம்பர்: மலேசியாவின் மிக வளமான மாநிலமாக சிலாங்கூர் தனது நிலையை மீண்டும் உறுதிப்படுத்தியுள்ளது. 2024 ஆம் ஆண்டில் மாநிலத்தின் வறுமை விகிதம் ஒரு சதவீதத்திற்கும் கீழே குறைந்திருப்பது, உள்ளடக்கமான பொருளாதார கொள்கைகள் மற்றும் மக்கள் சுயதொழில் மற்றும் வாழ்வாதார மேம்பாட்டிற்கான பல திட்டங்களின் வெற்றிகரமான செயல்பாட்டின் விளைவாகும்.
மலேசிய புள்ளியியல் துறை தரவுகளின்படி, சிலாங்கூரின் மொத்த வறுமை விகிதம் 2022 ஆம் ஆண்டில் 1.5 சதவீதம் இருந்தது, 2024 இல் 0.9 சதவீதமாகக் குறைந்துள்ளது. இது நாட்டின் மிகக் குறைந்த வறுமை விகிதம் கொண்ட மாநிலங்களில் ஒன்றாக சிலாங்கூரை நிலைநிறுத்துகிறது.
இந்த வெற்றி தற்செயலானது அல்ல; மாறாக மாநில அரசின் ஒருங்கிணைந்த மூலோபாயங்களின் விளைவாகும் என்று மனித வளம் மற்றும் வறுமை ஒழிப்புத் துறைக்கான ஆட்சிக்குழு உறுப்பினர் வீ.பாப்பாராய்டு கூறினார். ஹிஜ்ரா சிலாங்கூர் மற்றும் இந்திய சமூக மற்றும் தொழில்முனைவோர் மேம்பாட்டு இலாகா (ஐ-சீட்) போன்ற முயற்சிகள் ஆயிரக்கணக்கான மக்களுக்கு வருமானத்தை அதிகரிக்கவும், சுயமாக வாழவும் உதவியுள்ளன.
சிலாங்கூர் மாநிலம் பல தரப்பு மக்களுக்கு பயனளிக்கும் வழியில் சிறு கடன், தொழில் பயிற்சி, மற்றும் அடிப்படை உபகரண உதவி போன்ற முயற்சிகளை ஒருங்கிணைத்து செயல்படுத்தியுள்ளது என்று அவர் கூறினார். சிலாங்கூர் மாநிலம் நட்புறவான கொள்கைகளை நடைமுறைப்படுத்தி, பிற மாநிலங்களுக்கு எடுத்துக்காட்டாக உள்ளது. இலவச தண்ணீர், இலவச பேருந்து, மற்றும் சிறு தொழில் உதவி திட்டங்கள் போன்ற சமூகத் திட்டங்கள் மக்களின் நலனில் நேரடி தாக்கத்தை ஏற்படுத்தியுள்ளன.
