ஷா ஆலம், செப்டம்பர் 24 - 2017 ஆம் ஆண்டில் மாநில அரசால் அறிமுகப்படுத்தப்பட்ட ஸ்மார்ட் (வாடகை)ரென்டல் திட்டம், பரந்த சந்தையுடன் ஒப்பிடும் போது அதிக மலிவு விலையில் வீட்டு வாடகையை வழங்குவதன் காரணமாக பிரபலமடைந்துள்ளது.
சிலாங்கூர் வீட்டுவசதி மற்றும் சொத்து வாரியத்தின் நிர்வாக இயக்குநர் டத்தோ ஜுஹாரி அஹ்மட் கூறுகையில், இந்தத் திட்டத்தின் கீழ் வாடகைக் கட்டணங்கள் மற்ற வீட்டு விருப்பங்களை விட 10 முதல் 15 சதவீதம் குறைவாக இருக்கும் என்று மதிப்பிடப்பட்டுள்ளது.
“இந்த வாடகைத் திட்டம், வங்கி நிதியுதவியைப் பெற முடியாதவர்கள் தங்கள் வீட்டுச் சேமிப்பைக் கட்டியெழுப்ப உதவுவதை நோக்கமாகக் கொண்டுள்ளது, வாடகைக் காலத்தின் முடிவில் மொத்த வாடகைக் கொடுப்பனவுகளில் 30 சதவீதம் திரும்ப வழங்கப்படும்.
“இந்தத் திட்டத்தின் கீழ் வாடகைக் கட்டணங்கள் RM450 முதல் RM800 வரை இருக்கும், அதன் தொடக்கத்திலிருந்து 852 குடும்பங்கள் இதன் மூலம் பயனடைந்துள்ளனர்,” என்று அவர் இன்று செத்தியா நகர மாநாட்டு மையத்தில் 2025 சிலாங்கூர் பட்ஜெட் உரையாடல் அமர்வின் போது கூறினார்.
சிலாங்கூரில் மலிவு விலை வீடுகளுக்கான தேவை தொடர்ந்து வலுவாக உள்ளது, 146,987 விண்ணப்பங்கள் பெறப்பட்டுள்ளன என்று ஜுஹாரி மேலும் கூறினார். இந்த எண்ணிக்கையில், கிட்டத்தட்ட 50 சதவீதம் பேர் பெட்டாலிங் மாவட்டத்தைச் சேர்ந்தவர்கள்.
இதற்கிடையில், ரியல் எஸ்டேட் மற்றும் (வீடமைப்பாளர்கள்) டெவலப்பர்ஸ் அசோசியேஷன் மலேசியாவின் தேசிய கவுன்சில் உறுப்பினர் டத்தோ டான் ஹான் லிம், பொதுமக்களுக்கும் டெவலப்பர்களுக்கும் பயனளிக்கும் மலிவு விலையில் வீடுகளை கட்டுவதற்கான புதிய சூத்திரம் தேவை என்று கூறினார்.
பல டெவலப்பர்கள் ஒன்றிணைக்கும் ஒரு நிதி அல்லது அடித்தளத்தை உருவாக்க நாங்கள் முன்மொழிகிறோம். இந்த நிதியின் மூலம், தேவை அதிகம் உள்ள இடங்களில் மலிவு விலையில் வீடுகளை கட்ட முடியும்.
இது கட்டப்பட்ட ஒவ்வொரு யூனிட்டும் வாங்கப்பட்டு இருப்பதை உறுதி செய்யும், இதனால் திட்டங்கள் கைவிடப்படும் அபாயத்தைத் தவிர்க்கும்," என்று அவர் கூறினார்.
ஸ்மார்ட் வாடகைத் திட்டம் குறைந்த மற்றும் நடுத்தர வருவாய் பிரிவினருக்கு அதிகபட்சமாக ஐந்து வருட வாடகை காலத்துடன் தங்கள் சொந்த வீடுகளை பெறுவதற்கான வாய்ப்பை வழங்குகிறது.
