சிப்பாங், ஏப் 15: கோலாலம்பூர் சர்வதேச விமான நிலையத்தின் முதலாவது முனையத்தில் (கே.எல்.ஐ.ஏ) நேற்று காலை நடந்த துப்பாக்கிச் சூடு சம்பவம் தொடர்பான விசாரணைக்கு உதவ 11 சாட்சிகளிடமிருந்து காவல்துறயினர் வாக்குமூலம் பெற்றுள்ளனர்.
வாக்குமூலம் அளித்தவர்களில் சுடப்பட்ட மெய்க்காப்பாளர், சந்தேக நபரின் மனைவி, விமான நிலையத்தின் பாதுகாப்புக் காவலர்கள், காவல்துறையினர் மற்றும் சிகிச்சை அளித்த மருத்துவர்களும் அடங்குவர் என சிலாங்கூர் காவல்துறைத் தலைவர் டத்தோ ஹுசைன் ஓமர் கான் கூறினார்.
"வணிகர்கள், குடும்ப உறுப்பினர்கள் (சந்தேக நபர் மற்றும் பாதிக்கப்பட்டவர்) மற்றும் விசாரணைக்கு உதவக்கூடிய பல நபர்களை வாக்குமூலம் பெற அழைப்போம்," என அவர் இன்று ஊடகங்களுக்குத் தெரிவித்தார்.
சந்தேக நபரைக் காவல்துறையினர் தீவிரமாகக் கண்காணித்து வருவதாகவும், அந்நபர் இன்னும் நாட்டில் இருப்பதாக நம்புவதாகவும் அவர் கூறினார்.
இந்த சம்பவத்தில் வேறு எந்த நபருக்கும் தொடர்பு இல்லை என்றும் சாட்சிகளின் வாக்குமூலம் மற்றும் சிசிடிவி மூலம் சந்தேகநபரின் அடையாளம் உறுதி செய்யப்பட்டுள்ளதாகவும் ஹுசைன் கூறினார்.
– பெர்னாமா