லிம்பாங், பிப் 26 –சரவாக் லாவாஸ் மாவட்டத்தில் உள்ள கம்போங் செபெராங் கிடையில் நேற்றிரவு தீயில் கருகி மூன்று சகோதரர்கள் வீட்டில் மரணம் அடைந்தனர். அவர்கள் 6 குடும்ப உறுப்பினர்களுடன் வசித்து வந்த வீட்டில் தீப்பிடித்ததில் மூன்று சகோதரர்கள் தீயில் கருகி உயிரிழந்தனர்.
மூன்று உடன்பிறந்தவர்கள் நான்கு வயது முகமது எஸ்டி ஹுசைடி அஸ்ரி மற்றும் அவரது இரண்டு மூத்த சகோதரர்கள், முறையே ஏழு மற்றும் எட்டு வயதுடைய முகமது எஸ்மி ஹுசைலி அஸ்ரி மற்றும் முகமது எஸ்ரி ஹுஸைமி அஸ்ரி என அடையாளம் காணப்பட்டனர்.
மற்ற 6 குடும்ப உறுப்பினர்களும் தீப்பிடித்த வீட்டில் இருந்து தப்பிச் சென்றதாக தெரிவிக்கப்பட்டுள்ளது.
சரவாக் தீயணைப்பு மற்றும் மீட்புத் துறையின் செயல்பாட்டு மையத்தின் செய்தித் தொடர்பாளர் கூறுகையில், லாவாஸ் தீயணைப்பு மற்றும் மீட்பு நிலையத்தைச் சேர்ந்த ஏழு தீயணைப்பு வீரர்கள் அடங்கிய குழு இரவு 11 மணிக்கு ஒரு பேரிடர் அழைப்பைப் பெற்ற பின்னர் சுமார் 17 கிலோமீட்டர் தொலைவில் உள்ள சம்பவ இடத்திற்கு விரைந்ததாக தெரிவித்தார்.
"இரண்டு மாடி நிரந்தரக் கட்டிடத்தில் தீ விபத்து ஏற்பட்டது, அது 100 சதவீதம் எரிந்து நாசமானது" என்று செய்தித் தொடர்பாளர் கூறினார்.
செய்தித் தொடர்பாளர்களின் கூற்றுப்படி, தீயில் தப்பிய ஆறு பேர் பலியானவர்களின் பெற்றோர்களான அஸ்ரி லத்திப், 45, மற்றும் டாயாங்கு அடியனாவதி, 38, அவர்களின் மூத்த சகோதரர்கள், சகோதரி ஆரியனா அஸ்ரி, 14, மற்றும் சகோதரர் முகமது எஸ்ரி அஸ்ரி,12 ,மற்றும் அவர்களின் தாத்தா பாட்டிகளான அவங்கு ஜெமன் பெங்கிரன் அப்துலி ஹமீத், 72, மற்றும் அமினா மாடுசோப், 73.
இன்று நள்ளிரவு 12.45 மணியளவில் தீயை அணைக்கும் பணி முடிவடைந்து, சடலங்கள் மேலதிக நடவடிக்கைகளுக்காக போலிசாரிடம் ஒப்படைக்கப்பட்டன.
