சிரம்பான், பிப் 25 - புனித ரமலான் மாதத்தை மதிக்காமல், சமூக வலைதளத்தில் பகிரங்கமாக உணவு அருந்தியதாகக் கூறப்படும் 27 வயதுப் பெண் ஒருவரை நெகிரி செம்பிலான் மாநில இஸ்லாமிய சமய விவகாரத் துறை (JHEAINS) கைது செய்துள்ளது.
கடந்த ஞாயிற்றுக்கிழமை, அந்தப் பெண் தனது டிக் டோக் (TikTok) கணக்கில் நேரலையில் (Live) இருந்தபோது, நோன்பு துறக்கும் நேரத்திற்கு முன்னதாகவே பகிரங்கமாகச் சாப்பிட்டும் குடித்தும் வந்ததாகப் புகார்கள் எழுந்ததைத் தொடர்ந்து இந்த நடவடிக்கை எடுக்கப்பட்டுள்ளது.
இந்த விவகாரம் குறித்துக் கருத்துரைத்த JHEAINS இயக்குநர் அஸ்ரி அப்துல்லா, சம்பந்தப்பட்ட பெண் நேற்று கோலா பிலாவில் கைது செய்யப்பட்டதாகத் தெரிவித்தார்.
முதற்கட்ட விசாரணையின்படி, அன்று மாலை சுமார் 6.45 மணியளவில் அந்தப் பெண் தனது பின்தொடர்பாளர்களுடன் நேரலையில் உரையாடிக்கொண்டிருந்தபோது, வேண்டுமென்றே மற்றவர்கள் பார்க்கும் வகையில் உணவு மற்றும் பானங்களை உட்கொண்டது உறுதி செய்யப்பட்டுள்ளது.
இது இஸ்லாமிய சமயத்தின் புனிதத்தைக் கெடுக்கும் செயலாகக் கருதப்படுவதால், 1992-ஆம் ஆண்டு நெகிரி செம்பிலான் மாநில ஷரியா குற்றவியல் சட்டத்தின் 50-வது பிரிவின் கீழ் (இஸ்லாமிய சமயத்தை இழிவுபடுத்துதல்) விசாரணை மேற்கொள்ளப்பட்டு வருகிறது.
பொதுமக்கள், குறிப்பாக முஸ்லிம்கள், ரமலான் மாதத்தின் புனிதத்தைப் பேணுவதோடு, சமய உணர்வுகளுக்கு மதிப்பளித்து நற்பண்புகளுடன் நடந்துகொள்ள வேண்டும் என்று அஸ்ரி அப்துல்லா அறிவுறுத்தினார்.
இம்மாநிலத்தில் இஸ்லாமிய சமயம் தொடர்பான விவகாரங்கள் சட்டதிட்டங்களுக்கும் ஷரியா கொள்கைகளுக்கும் உட்பட்டு முறையாகக் கையாளப்படுவதை JHEAINS தொடர்ந்து உறுதி செய்யும் என்றும் அவர் தெரிவித்தார்.
முன்னதாக, அந்தப் பெண் நேரலையில் தண்ணீர் குடிப்பது போன்ற காட்சிகள் சமூக வலைதளங்களில் வைரலாகிப் பெரும் கண்டனத்தைப் பெற்றது குறிப்பிடத்தக்கது.
