ஷா ஆலம், பிப் 25 - மலேசியாவுக்கான அமெரிக்கத் தூதராக சர்ச்சைக்குரிய நிக் ஆடம்ஸை நியமிக்கும் பரிந்துரையை அமெரிக்க அதிபர் டோனல்ட் டிரம்ப் மீட்டுக் கொண்டுள்ளார். இதன்வழி, அந்த நியமனம் குறித்த அனைத்து ஊகங்களுக்கும் முற்றுப்புள்ளி வைக்கப்பட்டுள்ளது.
இருப்பினும், தம்மை ஒரு 'ஆல்பா மேல்' என்று அழைத்துக்கொள்ளும் ஆடம்ஸ், தமக்கு விரைவில் ஒரு புதிய பதவி உயர்வு வழங்கப்பட்டுள்ளதாகத் தெரிவித்துள்ளார். ஆனால், அதுகுறித்த கூடுதல் விவரங்களைத் தெரிவிக்க அவர் மறுத்துவிட்டார்.
டிரம்ப் அதிபர் பதவியேற்று 13 மாதங்கள் ஆகியும், ஆஸ்திரேலியாவுக்கான தூதரை இன்னும் அவர் பரிந்துரைக்கவில்லை என்றும் தெரிவிக்கப்பட்டுள்ளது.
'மேக் அமெரிக்கா கிரேட் அகெய்ன்' (MAGA) இயக்கத்தின் தீவிர ஆதரவாளரும், சிட்னியில் மன்ற உறுப்பினராகப் பணியாற்றிய எழுத்தாளருமான ஆடம்ஸ், கடந்த ஆண்டு ஜூலை மாதம் மலேசியாவுக்கான தூதராகப் பரிந்துரைக்கப்பட்டார்.
ஆனால், அவரது நியமனம் செனட் சபையால் ஒருபோதும் உறுதிப்படுத்தப்படவில்லை. மேலும், கடந்த ஆண்டு இறுதியில் அது காலாவதியானது.
ஹங்கேரி, நார்வே, பிலிப்பைன்ஸ் ஆகிய நாடுகளுக்கான தூதர் வேட்பாளர்கள் உட்பட, கடந்த ஜனவரியில் செனட் சபையிடம் மீண்டும் சமர்ப்பிக்கப்பட்ட நீண்ட பரிந்துரைப் பட்டியலிலும் அவரது பெயர் இடம்பெறவில்லை. இம்மாதம் அனுப்பப்பட்ட மற்றொரு பட்டியலிலும் அவர் பெயர் சேர்க்கப்படவில்லை.
தி சிட்னி மார்னிங் ஹெரால்டை மேற்கோள் காட்டி நியூ ஸ்ட்ரெய்ட்ஸ் டைம்ஸ் (NST) வெளியிட்ட அறிக்கையின்படி, மலேசியாவுக்கான அமெரிக்கத் தூதர் பதவியை ஏற்கப்போவதில்லை என்பதை ஆடம்ஸ் மின்னஞ்சல் மூலம் உறுதிப்படுத்தியுள்ளார்.
இதற்கு முன்னர், ஆடம்ஸை தூதராக நியமிக்கும் பரிந்துரைக்கு மலேசியாவில் உள்ள பல தரப்பினரும் எதிர்ப்பு தெரிவித்திருந்தனர் என்பது குறிப்பிடத்தக்கது.
