ரமலான் மாதம் முழுவதும் ரெப்பில் ரயில் சேவை நேரம் நீட்டிப்பு

கோலாலம்பூர், பிப் 23 - இந்த ரமலான் மாதம் முழுவதும் பயணிகளின் பயண முறையில் ஏற்படும் மாற்றங்களுக்கு ஏற்ப, உச்ச நேர ரயில் சேவையின் காலத்தை ரெப்பில் ரயில் நிறுவனம் (Rapid Rail) நீட்டிக்கும் என்று போக்குவரத்து அமைச்சர் அந்தோணி லோக் கூறினார்.

இந்த மாற்றத்தின்படி, காலை உச்ச நேரம், வழக்கமான காலை 7 மணி முதல் 9.30 மணி வரை என்பதற்குப் பதிலாக, காலை 6.30 மணி முதல் 9.30 மணி வரை நீட்டிக்கப்படும். அதேபோல், மாலை உச்ச நேரம், வழக்கமான மாலை 5 மணி முதல் 7.30 மணி வரை என்பதற்குப் பதிலாக, மாலை 4 மணி முதல் இரவு 8 மணி வரை நீட்டிக்கப்படும் என்று அவர் கூறினார்.

"இந்த நடவடிக்கை சேவையின் சுமுகமான இயக்கத்தை உறுதி செய்வதற்கும், பயணிகளின் வசதியை அதிகரிப்பதற்கும், செயல்பாட்டுத் திறனுக்கு உத்தரவாதம் அளிப்பதற்கும் செயல்படுத்தப்படுகிறது, குறிப்பாக, நோன்பு திறப்பு ஏற்பாடுகளுக்காக முன்கூட்டியே வீட்டிற்குத் திரும்பும் பயணிகளின் போக்குவரத்தை நிர்வகிப்பதில் இது உதவும்," என்று அந்தோணி இன்று மக்களவையில் கேள்வி பதில் அங்கத்தின்போது தெரிவித்தார்.

பிரசரானா மலேசியா பெர்ஹாட் (பிரசரானா) நிறுவனத்தின் துணை நிறுவனமான Rapid Rail சேவையின் உச்ச நேரங்கள், பயணிகளின் பயண முறையில் ஏற்படும் மாற்றங்களைக் கருத்தில் கொண்டு ரமலான் மாதத்தில் மாற்றப்படுமா என்று சியாரெட்சான் ஜோஹான் (PH-பங்கி) எழுப்பிய கேள்விக்கு அவர் இவ்வாறு பதிலளித்தார்.

ரமலான் மாதத்தில் சேவைத் தடங்கல்களைச் சமாளிப்பதற்கான தயார்நிலை குறித்த சியாரெட்சானின் துணைக் கேள்விக்குப் பதிலளித்த லோக், இந்த விஷயம் ரமலான் மாதத்திற்கு மட்டும் அல்லாமல், எல்லா நேரங்களிலும் செயல்படுத்தப்படுகிறது என்றார்.

"இருப்பினும், நாங்கள் இப்போது முன்கணிப்பு மற்றும் தடுப்பு பராமரிப்பு முறையைப் பின்பற்றுகிறோம். இது எங்கள் அமைப்புகள் மற்றும் ரயில்களுக்கு சீரான இடைவெளியில் பராமரிப்புப் பணிகள் மேற்கொள்ளப்படுவதை உறுதிசெய்கிறது. இதன் மூலம் சேவைத் தடங்கல்கள் ஏற்படுவதற்கான சாத்தியக்கூறுகளைக் குறைக்க முடியும்," என்று அவர் கூறினார்.

தொழில்நுட்பக் கோளாறுகளை கணிப்பது கடினம் என்றாலும், ரயில்களில் தொழில்நுட்பப் பணியாளர்களை நியமிப்பது, பயணிகளின் நடமாட்டத்தைக் கட்டுப்படுத்தவும் நெரிசலைக் குறைக்கவும் நிலைய நிர்வாகப் பயிற்சிகள் வழங்குவது உட்பட பல்வேறு தணிப்பு நடவடிக்கைகள் எடுக்கப்பட்டுள்ளன என்று அவர் குறிப்பிட்டார்.

இதற்கிடையில், பராமரிப்பின் செயல்திறன் மற்றும் முக்கிய செயல்திறன் குறிகாட்டிகள் (KPI) குறித்து டாக்டர் அப்துல் கனி அஹமட் (PN-ஜெர்லுன்) எழுப்பிய துணைக் கேள்விக்குப் பதிலளித்த லோக், 2022ஆம் ஆண்டிலிருந்து ரயில் சேவைத் தடங்கல்களின் எண்ணிக்கை கணிசமாகக் குறைந்துள்ளது என்றார்.

"எனவே, தொடர்ச்சியான மேம்பாடுகள் உள்ளன, மேலும் சிறந்த பராமரிப்பை உறுதிசெய்ய பிரசரானா தரப்பில் எடுக்கப்பட்ட தணிப்பு நடவடிக்கைகள் பலனளித்துள்ளன என்பதைக் காட்டுகிறது."

"ஐந்து நிமிடங்களுக்கு மேல் ரயில் இயங்கவில்லை என்றால் அது ஒரு தடங்கலாகக் கருதப்படுகிறது என்று ஒரு KPI-யை நாங்கள் அமைத்துள்ளோம். எனவே, ஒரு தடங்கல் ஏற்பட்டால், அதை விரைவில் சரிசெய்ய முடியும் என்பதை நாங்கள் உறுதிசெய்ய விரும்புகிறோம்," என்று அந்தோணி கூறினார்.

போக்குவரத்து அமைச்சும் பிரசரானாவும், ரயில் சேவைகள் மிகவும் திறமையாகவும் மக்கள் நம்பக்கூடியதாகவும் இருப்பதை உறுதிசெய்ய, தகவல் தொடர்பு மற்றும் பயணிகள் மேலாண்மை அம்சங்களைத் தொடர்ந்து மேம்படுத்தும் என்று அவர் கூறினார்.

-- பெர்னாமா