கோலாலம்பூர், பிப் 23 – தொற்றா நோய்களின் அதிகரிப்பை எதிர்கொள்ளும் அரசாங்க மருத்துவமனைகளின் தயார்நிலை மற்றும் தலசீமியா நோய் தொடர்பான பிரச்சனைகளும் இன்றைய மக்களவைக் கூட்டத்தில் முக்கிய கவனம் பெறுகின்றன.
நாடாளுமன்ற நடவடிக்கைகளின்படி, கேள்வி பதில் நேரத்தில், சோங் ஜெமின் சுகாதார அமைச்சரிடம், நீரிழிவு மற்றும் இதய நோய் போன்ற தொற்றுநோயற்ற நோய்களின் அதிகரிப்பைச் சமாளிக்க அரசாங்க மருத்துவமனைகளின் தயார்நிலை குறித்தும், ஆரம்பகால தடுப்பு நடவடிக்கைகளுக்கான சிறப்பு ஒதுக்கீடு குறித்தும் கேள்வி எழுப்புவார்.
டத்தோ டாக்டர் அஹ்மத் யூனுஸ் ஹைரி (பிஎன்-கோலா லங்காட்) சுகாதார அமைச்சரிடம், நாட்டில் உள்ள தலசீமியா நோயாளிகளின் தற்போதைய எண்ணிக்கை, ஒரு நோயாளிக்கு குழந்தைப் பருவம் முதல் 40 வயது வரை சிகிச்சை அளிக்கத் தேவைப்படும் செலவு மற்றும் நோயாளிகளுக்காக 'ஜீன் தெரபி' (Gene Therapy) சிகிச்சை முறையை அரசாங்கம் உருவாக்குமா என்பது குறித்தும் வினவுவார்.
அதே அமர்வில், சைட்ரெட்சான் ஜோஹான் (பிஎச்-பங்கி), ரமலான் மாதத்தில் மாறும் பயண முறைகளைக் கருத்தில் கொண்டு 'ரேபிட் ரெயில்' சேவைகளின் உச்ச நேரம் மாற்றப்படுமா என்றும், அவ்வாறு மாற்றப்பட்டால் புதிய உச்ச நேரம் என்னவாக இருக்கும் என்றும் போக்குவரத்து அமைச்சரிடம் கேட்பார்.
மேலும், டத்தோ டாக்டர் ரிச்சர்ட் ராபு (ஜிபிஎஸ்-பெத்தோங்), 'மலேசியா கேர் எக்கானமி' கட்டமைப்பு மற்றும் 2026-2030 செயல் திட்டம், முதியோர்கள், குழந்தைகள் மற்றும் மாற்றுத்திறனாளிகளுக்கான (OKU) பராமரிப்பில் உள்ள அணுகல், தரம் மற்றும் பணியாளர் பற்றாக்குறை போன்ற இடைவெளிகளை எவ்வாறு கையாளும் என்று மகளிர், குடும்ப மற்றும் சமூக மேம்பாட்டு அமைச்சரிடம் கேள்வி எழுப்புவார். அத்துடன், குறிப்பிட்ட காலகட்டத்திற்கான இலக்குகள், ஒதுக்கீடுகள் மற்றும் செயல்திறன் குறிகாட்டிகள் குறித்தும் அவர் அறிய விரும்புவார்.
கேள்வி பதில் நேரம் முடிந்ததும், சட்டம் மற்றும் நிறுவன சீர்திருத்தத்திற்கான பிரதமர் துறை அமைச்சர், அரசியலமைப்பு (திருத்த) மசோதா (எண் 1) மற்றும் அரசியலமைப்பு (திருத்த) மசோதா (எண் 2) 2026 ஆகியவற்றைத் தாக்கல் செய்வார். நிதியமைச்சர், கூடுதல் ஒதுக்கீட்டு மசோதா (2025) 2026-ஐ முதல் வாசிப்புக்காகத் தாக்கல் செய்வார்.
நிதியமைச்சரால் மக்கள் தொகை அடிப்படையிலான மானிய மசோதா 2026 இரண்டாவது வாசிப்புக்குத் தாக்கல் செய்யப்படும். அதனைத் தொடர்ந்து, பிரதமர் துறை அமைச்சர் (சட்டம் மற்றும் நிறுவன சீர்திருத்தம்) தேசிய தணிக்கைத் துறை அறிக்கை (LKAN) 1/2026 மீதான ஒரு பிரேரணையை முன்வைப்பார்.
