புத்ராஜெயா, ஜன 6- பிரதமர் டத்தோஸ்ரீ அன்வார் இப்ராஹிம், 2026 புத்தாண்டுக்கான தனது முதல் அதிகாரப்பூர்வப் பயணமாக இன்று துருக்கிக்கு புறப்பட்டார். அவரது பயணம் ஜனவரி 8 வரை நீடிக்கும்.
இரு நாடுகளுக்கும் இடையிலான இருதரப்பு உறவுகளை வலுப்படுத்தும் நோக்கில், ஒரு தூதுக்குழுவுடன் தாம் துருக்கிக்கு புறப்பட்டதாக பிரதமர் தெரிவித்தார்.
"நீண்டகாலமாக நிலவி வரும் நட்புறவு மற்றும் பரஸ்பர மரியாதை அடிப்படையில் பல்வேறு துறைகளில் பரந்த ஒத்துழைப்புக்கான வாய்ப்புகளை இந்த பயணம் திறக்கிறது. அனைத்து காரியங்களும் எளிதாக அமைய இன்ஷா அல்லாஹ்," என்று அவர் செவ்வாய்க்கிழமை தனது முகநூல் பதிவில் தெரிவித்தார்.
இந்த அதிகாரப்பூர்வப் பயணம் உயர்மட்ட சந்திப்புகள் மற்றும் இரு நாடுகளின் பொதுவான நலன்கள் தொடர்பான மூலோபாய ஒத்துழைப்பு பேச்சுவார்த்தைகளை உள்ளடக்கும் என எதிர்பார்க்கப்படுகிறது.
இரு நாடுகளுக்கும் இடையே நீண்டகாலமாக நிலவி வரும் இருதரப்பு உறவுகளை வலுப்படுத்தும் முயற்சியின் ஒரு பகுதியாக, பிரதமர் இன்று முதல் ஜனவரி 8 வரை துருக்கிக்கு அதிகாரப்பூர்வப் பயணம் மேற்கொள்கிறார்.
நேற்று, பிரதமரின் மூத்த பத்திரிகை செயலாளர் துங்கு நஸ்ருல் அபைடா கூறுகையில், இந்த பயணத்தின் போது, பிரதமர் அதிபர் ரெசெப் தயிப் எர்டோகனுடன் சந்திப்பு நடத்தவும், மலேசியா-துருக்கி உயர்மட்ட மூலோபாய ஒத்துழைப்பு மன்றத்திற்கு இணைந்து தலைமை தாங்கவும் திட்டமிடப்பட்டுள்ளது.
மேலும், இந்த பயணம் மலேசியா மற்றும் துருக்கி ஆகிய இரு நாடுகளின் மூலோபாய ஒத்துழைப்பை மேலும் ஒழுங்கமைக்கப்பட்ட மற்றும் விரிவான முறையில் மேம்படுத்துவதற்கான பொதுவான உறுதிப்பாட்டை பிரதிபலிக்கிறது.
