போயிங் விமானக் கொள்முதல் நாட்டின் கடன் அளவைப் பாதிக்காது - நிதியமைச்சு

கோலாலம்பூர், ஆக.19 - சுமார்  950 கோடி அமெரிக்க டாலர் மதிப்பில் செய்யப்படும்  இரண்டாம் கட்ட  போயிங் விமானக் கொள்முதல் நாட்டின் கடன் அளவை பாதிக்காது என்பதோடு, மலேசியாவின் நிதிப் பற்றாக்குறைக்கு எந்த விளைவையும் ஏற்படுத்தாது என்று துணை நிதியமைச்சர் லிம் ஹுய் யிங் கூறினார்.

பதிமூன்றாவது மலேசியத் திட்டத்தில்  கோடிட்டுக் காட்டப்பட்டுள்ள திட்டங்களின் ஒரு பகுதியாக இந்த விமானம் வாங்கப்பட்டது என்று அவர் மக்களவையில் இன்று கூறினார்.

இந்த நேரத்தில் எல்லாம் எங்கள் எதிர்பார்ப்புகளுக்குள் உள்ளது என்று இன்று மக்களவையில் நடைபெற்ற கேள்வி-பதில் அமர்வில் லிம் தெரிவித்தார்.

மலேசியா அமெரிக்காவிடமிருந்து விமானங்களை வாங்குவதற்கு உறுதியளித்த பிறகு நாட்டின் கடன் சுமையைக் கட்டுப்படுத்துவதில் அரசாங்கத்தின் அவசர நடவடிக்கைகள் குறித்து  பாசீர் பூத்தே  தொகுதி பெரிக்கத்தான் நேஷனல் உறுப்பினர் டத்தோ நிக் முகமது எழுப்பிய துணைக் கேள்விக்கு அவர்  இவ்வாறு பதிலளித்தார்.

புவிசார் அரசியலில் நிலவும் நிச்சயமற்ற தன்மைகளுக்கு மத்தியில் தேசியக் கடன் அதிகமாக இருக்க அனுமதிப்பதற்கான அரசாங்கத்தின் நியாயம் குறித்த நிக் முகமதுவின் மூலக் கேள்விக்கு பதிலளித்த லிம், வளர்ச்சி செலவினங்களை ஈடுகட்ட நிதிப் பற்றாக்குறைக்கு நிதியளிக்க வேண்டியதன் காரணமாக அரசாங்கக் கடன் அதிகரித்துள்ளது என்றார்.

அரசாங்கத்தின் நிதி நிலை பற்றாக்குறையில் இருக்கும் வரை இந்த நிதியுதவி அரசாங்கத்தின் கடன் அளவை நேரடியாக அதிகரிக்கும் என்று அவர் கூறினார்.

வரி வருமானம் மற்றும் வரி அல்லாத வருமானம் போன்ற பல்வேறு ஆதாரங்கள் மூலம் அரசாங்கம் மேம்பாட்டு செலவினங்களுக்கு நிதியளிக்கிறது என்று லிம் கூறினார்.

இதுவரை மத்திய அரசின் கடன் தொடர்பான சட்டங்களில் அனுமதிக்கப்பட்ட சட்டப்பூர்வ வரம்பைத் தாண்டி அரசாங்கம் ஒருபோதும் கடன் வாங்கியதில்லை என்பதையும் அவர் தெளிவுபடுத்தினார்.