கோலாலம்பூர், மே 17- “பிக்கிட்ஸ்“ எனப்படும் சிறார்களுக்கான தேசிய கோவிட்-19 தடுப்பூசித் திட்டத்தின் கீழ் 5 முதல் 11 வயது வரையிலான சிறார்களில் 10 லட்சத்து 63 ஆயிரத்து 569 பேர் அல்லது 30 விழுக்காட்டினர் கோவிட்-19 தடுப்பூசியை முழுமையாகப் பெற்றுள்ளனர்.
மேலும் 46.4 விழுக்காட்டுச் சிறார்கள் அல்லது 16 லட்சத்து 46 ஆயிரத்து 257 பேர் முதல் டோஸ் கோவிட்-19 தடுப்பூசியைப் பெற்றுள்ளதாக சுகாதார அமைச்சின் கோவிட்நாவ் அகப்பக்கம் கூறியது.
நாட்டிலுள்ள பெரியவர்களில் 1 கோடியே 60 லட்சத்து 66 ஆயிரத்து 397 பேர் அல்லது 68.3 விழுக்காட்டினர் பூஸ்டர் எனப்படும் ஊக்கத் தடுப்பூசியைப் பெற்றுள்ளனர்.
மேலும், 2 கோடியே 29 லட்சத்து 71 ஆயிரத்து 246 பேர் அல்லது 97.6 விழுக்காட்டினர் இரண்டு டோஸ் தடுப்பூசியைப் பெற்ற வேளையில் 98.8 விழுக்காட்டினர் அல்லது 2 கோடியே 32 லட்சத்து 47 ஆயிரத்து 211 பேருக்கு குறைந்தது ஒரு டோஸ் தடுப்பூசி செலுத்தப்பட்டுள்ளது.
பன்னிரண்டு முதல் 17 வயது வரையிலான இளையோரில் 93.4 விழுக்காட்டினர் அல்லது 29 லட்சத்து 5 ஆயிரத்து 317 பேர் இரண்டு டோஸ் தடுப்பூசியை முழுமையாகப் பெற்றனர். மேலும், 96.5 விழுக்காட்டினர் அல்லது 30 லட்சத்து 2 ஆயிரத்து 852 பேருக்கு குறைந்தது ஒரு டோஸ் தடுப்பூசி செலுத்தப்பட்டது.
நேற்று நாடு முழுவதும் 9,228 பேருக்கு கோவிட்-19 தடுப்பூசி செலுத்தப்பட்டது. அவர்களில் 2,700 பேர் முதல் டோஸ் தடுப்பூசியையும் 4,779 பேர் இரண்டாவது டோஸ் தடுப்பூசியையும் 1,749 பேர் ஊக்கத் தடுப்பூசியையும் பெற்றனர்.
இதன் வழி பிக் எனப்படும் தேசிய கோவிட்-19 தடுப்பூசித் திட்டத்தின் கீழ் செலுத்தப்பட்ட தடுப்பூசிகளின் எண்ணிக்கை 7 கோடியே 6 லட்சத்து 89 ஆயிரத்து 336 ஆக உயர்ந்துள்ளது.
இதனிடையே, நாட்டில் நேற்று கோவிட்-19 தொடர்புடைய 5 மரணச் சம்பவங்கள் பதிவு செய்யப்பட்டதாக சுகாதார அமைச்சின் கிட்ஹாப் அகப்பக்கம் கூறியது.
