ஷா ஆலம், டிச 26 : தொலைபேசி மோசடியால் வயதான பெண்மணி ஒருவர் RM1 மில்லியனுக்கும் அதிகமான இழப்பைச் சந்தித்துள்ளார்.
63 வயதான பாதிக்கப்பட்டவரின் வங்கிக் கணக்கு, மோசடி நடவடிக்கைகளில் ஈடுபட்டுள்ளதாகக் கூறி தேசிய மோசடி செயல்பாட்டு மையத்தின் (NSRC) அதிகாரியாகக் காட்டிக் கொண்ட ஒரு நபரிடமிருந்து அழைப்பு வந்ததாகப் புக்கிட் அமான் வணிக குற்றப் புலனாய்வுத் துறை (JSJK) அறிவித்தது.
இதைத் தொடர்ந்து, விசாரணை மற்றும் வழக்கின் நடவடிக்கைகளுக்காகப் பல பணப் பரிமாற்ற பரிவர்த்தனைகளைச் செய்ய பாதிக்கப்பட்டவருக்கு அறிவுறுத்தப்பட்டது.
கூடுதல் பணத்தை வேறொரு கணக்கிற்கு மாற்றுமாறு கேட்ட பின்னரே தான் மோசடி செய்யப்பட்டதை பாதிக்கப்பட்டவர் உணர்ந்தார்.
இந்த மோசடியின் மொத்த இழப்பு RM1,005,500 ஐ எட்டியதாகக் கூறப்படுகிறது.
NSRC, காவல்துறை அல்லது எந்தவொரு அமலாக்க நிறுவனமும் தொலைபேசி அழைப்புகள் மூலம் எந்த விசாரணையையும் நடத்தாது என்று அத்துறை வலியுறுத்தியது.
"கைதுகள் குறித்து தெரிவிக்க, சொத்துக்களை முடக்க அல்லது தொலைபேசியில் பணம் கோர அதிகாரிகள் பொதுமக்களைத் தொடர்பு கொள்ள மாட்டார்கள்" என்றும் JSJK முகநூலில் வெளியிட்ட அறிக்கையில் தெரிவிக்கப்பட்டுள்ளது.
பொதுமக்கள் யாரிடமும் வங்கித் தகவல்களை பகிர வேண்டாம் மற்றும் தெரியாத நபர்களிடமிருந்து வரும் எந்தவொரு பணப் பரிமாற்ற அறிவுறுத்தல்களுக்கும் இணங்க வேண்டாம் என்றும் அறிவுறுத்தப்படுகிறார்கள்.
மோசடி வழக்குகள் தொடர்பான தகவலும் அல்லது புகார்களும் 997 என்ற எண் மூலம் NSRCக்கு அனுப்பலாம் என தெரிவிக்கப்பட்டது.
