கோலாலம்பூர், நவ 28 — நாட்டில் மொத்தம் 49 சுகாதார மையங்கள் வெள்ளத்தால் பாதிக்கப்பட்டுள்ளன என்று சுகாதார அமைச்சர் டத்தோ ஶ்ரீ டாக்டர் சுல்கிஃப்ளி அஹ்மாட் தெரிவித்துள்ளார். இதில் 19 மையங்கள் மோசமான வானிலை காரணமாக மூடப்பட்டுள்ளதுடன், அவற்றின் செயல்பாடுகள் பிற இடங்களுக்கு மாற்றப்பட்டுள்ளன.
நேற்று பிற்பகல் 3 மணி அளவில் தேசிய நெருக்கடி தயார் மற்றும் பதிலளிப்பு மையம் (CPRC) வெளியிட்ட அறிக்கையின்படி, மேலும் 27 சுகாதார மையங்கள் தேவையான மாற்றங்களுடன் தொடர்ந்து செயல்பட்டு வருகின்றன. பெர்லிஸில் உள்ள மூன்று மையங்கள் தற்போது இயங்கவில்லை என்றும் அவர் குறிப்பிட்டார்.
பாதிக்கப்பட்ட பகுதிகளுக்கு உதவி வழங்குவதற்காக மொத்தம் 345 மருத்துவ மற்றும் சுகாதார அணிகள் அனுப்பப்பட்டுள்ளன. இந்த அணிகள் வெள்ளத்தில் பாதிக்கப்பட்டவர்களுக்கு அவசர உதவிகளை வழங்கி வருகின்றன என அமைச்சர் தெரிவித்தார்.
வெள்ளத்தால் இன்னும் ஏழு மாநிலங்கள் பாதிக்கப்பட்டுள்ளன. அவை கிளந்தான், பேராக், கெடா, பெர்லிஸ், திரங்கானு, சிலாங்கூர் மற்றும் பகாங் ஆகும். நேற்று பிற்பகல் 3 மணி நிலவரப்படி 27,955 பேர் மொத்தம் 222 தற்காலிக நிவாரண மையங்களில் தங்கவைக்கப்பட்டுள்ளனர்.
இதுவரை 2,083 வெள்ளப்பாதிப்பு நோயாளிகள் சிகிச்சை பெற்றுள்ளனர். இவர்களில் 376 பேர் தீவிர மூச்சுக் கோளாறு, 92 பேர் தோல் தொற்று, 15 பேர் தீவிர குடல்போக்கு நோய்கள் மற்றும் நான்கு பேர் கண்புண் காரணமாக சிகிச்சை பெற்றுள்ளனர்.
அதே நேரத்தில், எந்த தற்காலிக நிவாரண மையங்களிலும் நோய் பரவல் கண்டறியப்படவில்லை என்று அவர் உறுதிப்படுத்தினார். கிளந்தானில் வெள்ளத்தால் இரண்டு மரணங்கள் பதிவாகியுள்ளன என்றும் தெரிவித்தார்.
