ஷா ஆலாம், நவ 26- சிலாங்கூர் மாநில அரசாங்கம், மாநில மக்களுக்கு விரிவான சுகாதார வசதிகளை உறுதி செய்யும் நோக்கில், 200,000 சிலாங்கூர் வாசிகளுக்குக் சுகாதாரப் பாதுகாப்பை வழங்குவதற்காக சுமார் RM4 மில்லியன் நிதியை ஒதுக்கியுள்ளது.
சிலாங்கூர் மாநில மந்திரி புசார் டத்தோ ஸ்ரீ அமிருடின் ஷாரி அவர்கள், இந்த நிதி ஒதுக்கீட்டின் மூலம் ' இல்திசம் சிஹாட் சிலாங்கூர்' (Iltizam Selangor Sihat - ISS) திட்டத்தின் பலன்கள் 2024 ஆம் ஆண்டுக்குள் கிடைக்க வழிவகை செய்யப்பட்டுள்ளது என்று அறிவித்தார்.
இத்திட்டத்தின் மூலம், சிலாங்கூர் மக்கள் அடிப்படை சுகாதாரப் பராமரிப்பு மற்றும் தடுப்பூசி வசதிகளைப் பெறுவதுடன், ஆண்டுக்கு RM500 வரையிலான அடிப்படை மருத்துவச் சிகிச்சைகளையும், தனியார் மருத்துவமனைகளில் உள்நோயாளிகளுக்கான (hospitalization) சிகிச்சைகளுக்கு RM10,000 வரையிலான சுகாதாரப் பாதுகாப்பையும் பெறலாம்.
அத்துடன், குறிப்பிட்ட தீவிர நோய்களுக்கான (critical illness) சிகிச்சைக்கு RM10,000 வரையிலான பாதுகாப்பும் இந்தத் திட்டத்தில் உள்ளடங்கும்.
மேலும், குறைந்த வருமானம் ஈட்டும் B40 பிரிவினருக்குச் சுகாதார வசதிகளை மேம்படுத்தும் நோக்குடன், 2025 ஆம் ஆண்டு செப்டம்பர் மாதம் வரை நீட்டிக்கப்பட்டுள்ள பத்து வயதிற்கு உட்பட்ட குழந்தைகளுக்கான B40 சுகாதாரப் பராமரிப்பு திட்டத்திற்கும் RM4 மில்லியன் ஒதுக்கப்பட்டுள்ளது.
இதன்படி, அரசு ஊழியர்களுக்கான 'இல்திசம் சிஹாட் பென்ஜாவாட் அவாம்' (ISS Penjawat Awam) திட்டத்தின் கீழ் Gred 10 முதல் Gred 44 வரையிலான சிலாங்கூர் மாநில அரசு ஊழியர்களுக்கு தனியார் மருத்துவமனைகளில் சிகிச்சை பெற RM5 மில்லியன் நிதியுதவி வழங்கப்பட்டுள்ளது.
இந்தத் திட்டம், மாநில அரசு ஊழியர்களுக்கு RM5,000 வரையிலான அடிப்படைச் சிகிச்சை பலன்களையும், குழந்தைகள் மற்றும் மூத்த குடிமக்களுக்கான உதவிகளையும் RM200 வரையிலும், கண் கண்ணாடிகளுக்கான உதவித்தொகையை RM100 வரையிலும் வழங்குகிறது.
சிலாங்கூர் மாநிலத்தின் சுகாதாரத் திட்டங்களைச் சீரமைத்து, மேம்படுத்தி, 'இனிஷியேட்டிஃப் பெடூலி ரக்யாட்' (Inisiatif Peduli Rakyat - IPR) திட்டத்தின் ஒரு பகுதியாக 2024 ஆம் ஆண்டில் இருந்து அமல்படுத்தப்பட்டுள்ள 'இல்திசம் சிஹாட் சிலாங்கூர்' திட்டம் மூலம், அதிக எண்ணிக்கையிலான சிலாங்கூர் மக்களுக்குத் தரமான மருத்துவ சேவைகள் கிடைப்பதை மாநில அரசு உறுதி செய்துள்ளது.
