கோலாலம்பூர், நவ 21- நாட்டிற்குப் பலன் தரக்கூடிய ஆற்றல் வாய்ந்த இளம் விஞ்ஞானிகளுக்கான புதிய ஆராய்ச்சிகளுக்கு நிதியுதவி அளிப்பது குறித்து அறிவியல், தொழில்நுட்பம் மற்றும் புத்தாக்க அமைச்சகம் (MOSTI) பரிசீலனை செய்யும் என்று அந்தத் துறை அமைச்சர் சாங் லீ காங் தெரிவித்துள்ளார்.
இளம் விஞ்ஞானிகள் சாதனைக்கான தேசிய விருதுகள் (Anugerah Saintis Muda Negara) வெறும் அங்கீகாரத்திற்கான ஒரு தளமாக மட்டுமல்லாமல், அவர்களுக்கு ஆய்வு நிதியுதவிக்கான ஆதரவைப் பெறுவதற்கான வாய்ப்பையும் திறந்துவிடுகிறது என்று அவர் கூறினார்.
"முதலில் நாம் அங்கீகாரம் அளிக்கிறோம்... இரண்டாவதாக, அவர்களின் திட்டங்களைப் பற்றி ஆய்வு செய்வோம். பொருத்தமான திட்டங்கள் மற்றும் அவர்கள் எங்களிடம் விண்ணப்பம் செய்தால், அவர்களின் ஆராய்ச்சி மற்றும் மேம்பாட்டுத் திட்டங்களுக்கு நாங்கள் நிதியளிக்கலாம். ஆனால், முதன்மை இலக்கு இளம் விஞ்ஞானிகளுக்கு அங்கீகாரம் வழங்குவதே ஆகும்," என்று அவர் விளக்கினார்.
மேலும், இந்த விருதுகள், இளம் விஞ்ஞானிகளைத் தொழில்துறை நிறுவனங்கள் மற்றும் ஆய்வு நிறுவனங்களுடன் இணைக்க உதவுகிறது. ஏனெனில், அறிவியல் துறையில் தனியாகச் செயல்பட முடியாது; ஒத்துழைப்பு அவசியம் என்றும் அவர் வலியுறுத்தினார்.
