கோலாலம்பூர், அக் 25 — நேற்று நடைபெற்ற அமைச்சரவை கூட்டத்தில், நாட்டில் உள்ள அனைத்து பள்ளிகளில் நடைபெறும் நிகழ்ச்சிகள் மற்றும் நிதி உதவிகள் வழங்குவது தொடர்பான தற்போதைய வழிகாட்டுதல்களைத் தொடர்ந்து பயன்படுத்த ஒப்புதல் அளிக்கப்பட்டது.
இந்த முடிவு கடந்த ஆண்டு ஜூலை 24 அன்று எடுக்கப்பட்ட அமைச்சரவை தீர்மானத்துடன் ஒத்துப்போகிறது என கல்வி அமைச்சகம் தெரிவித்தது.
அதே நேரத்தில், பள்ளி மேலாண்மை குழு (LPS) நடத்தும் மண்டபங்கள் மற்றும் தனியார் பள்ளி மண்டபங்களில் தற்போதைய நடைமுறைகள் பின்பற்றப்பட வேண்டும் என தெரிவிக்கப்பட்டது.
இந்த அணுகுமுறை முந்தைய அரசுகளும் பின்பற்றிய வழக்கமான நடைமுறைகளுடன் இணங்கும்.
இந்த வழிகாட்டுதலின் படி, பள்ளி வளாகங்களில் நடைபெறும் நிதி திரட்டும் நிகழ்ச்சிகளில் மதுபானங்களை விளம்பரப்படுத்தவோ அல்லது காட்சிப்படுத்தவோ கூடாது.
பள்ளி வளாகங்களில் அல்லது அதன் அருகே மதுபான விழாக்கள் நடத்துவது அரசின் கல்வி மதிப்புகளுக்கு எதிரானது. எனவே அதற்கு அரசு ஒருபோதும் அனுமதி தராது என நாடாளுமன்றத்தில் பிரதமர் டத்தோ ஸ்ரீ அன்வார் இப்ராஹிம் தெரிவித்தார்.
கடந்த செப்டம்பர் 27 அன்று, பேராக், ஈப்போவில் உள்ள பள்ளி ஒன்றில் பழைய மாணவர் சங்கம் ஏற்பாடு செய்த மதுபான விழா சம்பவத்திற்குப் பிறகு பிரதமர் இந்த கருத்தை தெரிவித்தார்.
— பெர்னாமா
