ஈப்போ, அக் 24: பேராக் மாநிலத்தில் வெள்ள நிலைமை மேலும் மோசமடைந்துள்ளது. இன்று காலை 8 மணி நிலவரப்படி, 759 குடும்பங்களைச் சேர்ந்த மொத்தம் 2,171 பேர் பாதுகாப்புக்காக 22 தற்காலிக தங்கும் மையங்களுக்கு (PPS) மாற்றப்பட்டுள்ளனர்.
லாரூட் மாத்தாங் மற்றும் செலாமா (LMS) மாவட்டத்தில் 19 தற்காலிக தங்கும் மையங்கள் திறக்கப்பட்டுள்ளன. அவற்றில் 1,784 பேர் தங்க வைக்கப்பட்டுள்ளனர். மேலும், மூன்று மையங்கள் மாஞ்சோங் மாவட்டத்தில் அமைந்துள்ளன, அங்கு 387 பேர் தங்கியுள்ளனர் என பேராக் மாநிலப் பேரிடர் மேலாண்மை குழு தெரிவித்துள்ளது.
நேற்று காலை முதல் பெய்த கடும் மழை காரணமாக, லாரூட் மாத்தாங் மற்றும் செலாமா மாவட்டங்களின் பல பகுதிகளில் நீர் மட்டம் உயர்ந்துள்ளது. இதனால், குடிமக்கள் பாதுகாப்பு படை (APM), தீயணைப்பு மற்றும் மீட்பு துறை (JBPM), அரசு மலேசியக் காவல்துறை படை (PDRM), மற்றும் சமூக நலத் துறை (JKM) ஆகியவை மூலம் மீட்பு மற்றும் உதவி பணிகள் மேற்கொள்ளப்படுகின்றன.
இதற்கிடையில், மலேசிய வானிலை துறை (MetMalaysia) இன்று காலை லாரூட் மாத்தாங், செலாமா, கிரியான், மஞ்சோங், பேராக் தெங்கா, பகான் டத்தோ மற்றும் ஹிலிர் பேராக் ஆகிய மாவட்டங்களில் இடியுடன் கூடிய கனமழை பெய்யும் என எச்சரித்துள்ளது.
மேலும், கொலாம் புக்கிட் மேரா, சுங்கை கம்பார் மற்றும் சுங்கை ஸ்லிம் ஆகிய ஆறுகள் தற்போது ஆபத்தான நீர்மட்டத்தில் உள்ளதாகவும் அதிகாரிகள் தெரிவித்துள்ளனர்.
