கோலாலம்பூர், அக் 10 – 2026 ஆம் ஆண்டுக்கான பட்ஜெட்டில் மொத்தம் RM419.2 பில்லியன் ஒதுக்கப்பட்டுள்ளதாக நிதி அமைச்சு தெரிவித்துள்ளது. இது நாட்டின் மொத்த உள்நாட்டு உற்பத்தியின் 19.7 சதவீதத்தை பிரதிபலிக்கிறது.
இந்த தொகை 2025 திருத்தப்பட்ட பட்ஜெட்டுடன் ஒப்பிடுகையில் 1.7 சதவீதம் அதிகரிப்பைக் குறிக்கிறது.
RM419.2 பில்லியன் என நிர்ணயிக்கப்பட்ட 2026 பட்ஜெட்டில், RM338.2 பில்லியன் (அல்லது 80.7%) மேலாண்மை செலவுகளுக்கு ஒதுக்கப்பட்டுள்ளதுடன், மீதமுள்ள RM81 பில்லியன் மேம்பாட்டு செலவுகளுக்கு ஒதுக்கப்பட்டுள்ளது.
இந்த மொத்த ஒதுக்கீட்டில் 32.1 சதவீதம் கல்வி அமைச்சு, சுகாதார அமைச்சு மற்றும் பாதுகாப்பு அமைச்சகத்திற்கு வழங்கப்பட்டுள்ளது.
துறை அடிப்படையில் பார்க்கும்போது, RM155.9 பில்லியன் (37.2%) சமூகத் துறைக்கு, RM58.9 பில்லியன் (14.1%) பொருளாதாரத்திற்கும், RM44.5 பில்லியன் (10.6%) பாதுகாப்பிற்கும், RM20.7 பில்லியன் (4.9%) பொது நிர்வாகத்திற்கும் ஒதுக்கப்பட்டுள்ளது.
மீதமுள்ள 33.2 சதவீதம் கடன் மற்றும் இடமாற்று செலவுகளை நிரப்ப பயன்படுத்தப்படும் என அமைச்சகம் தெரிவித்துள்ளது.
அதே நேரத்தில், மேலாண்மை செலவுக்கான ஒதுக்கீடு RM338.2 பில்லியனாக இருக்கும் எனவும், இது 2025 திருத்தப்பட்ட பட்ஜெட்டிலிருந்து 1.8 சதவீதம் அதிகரிப்பு எனவும் குறிப்பிடப்பட்டுள்ளது.
மானியம் மற்றும் சமூக உதவிகள் மேலாண்மை செலவுகளில் 14.5 சதவீதம் ஆகும் எனவும், இது 2026-இல் 14.1 சதவீதம் குறைந்து RM49 பில்லியனாகும் என கணிக்கப்பட்டுள்ளது.
“இந்தக் குறைவு முக்கியமாக சர்வதேச பொருள் விலைகள் குறைந்திருப்பதாலும், மானியம் நிர்ணயிக்கப்பட்டதால் மற்றும் BUDI95 திட்டத்தின் அமலாக்கத்தாலும் ஏற்பட்டதாகும்,” என்று அறிக்கையில் தெரிவிக்கப்பட்டது.
மேலும், 2026 மேம்பாட்டு செலவினங்களின் ஒரு பகுதியாக RM1 பில்லியன் கடனுதவி வழங்கி மக்கள் வாழ்க்கைத் தரத்தையும் உள்கட்டமைப்பையும் மேம்படுத்த அரசு நடவடிக்கை எடுக்கும் என்றும் MOF தெரிவித்துள்ளது.
2025 திருத்தப்பட்ட பட்ஜெட்டில் மொத்த செலவினம் RM421 பில்லியனில் இருந்து RM412.1 பில்லியனாக குறைக்கப்பட்டதற்கு முக்கிய காரணம் ஊதிய செலவுகள், கடன் சேவை கட்டணங்கள் மற்றும் மேம்பாட்டு செலவுகளைச் சிறப்பாக செயல்படுத்த கூறப்பட்டுள்ளது.
2025 ஆம் ஆண்டில் மேலாண்மை செலவு RM332.1 பில்லியனாகவும், மேம்பாட்டு செலவு RM80 பில்லியனாகவும் கணிக்கப்பட்டுள்ளது.
“இந்த மாற்றம் பெரும்பாலும் ஊதியம், ஓய்வூதியம், கடன் சேவை கட்டணங்கள் மற்றும் சட்டபூர்வ நிறுவனங்களுக்கு வழங்கப்படும் மானியங்களின் சீரமைப்பால் ஏற்பட்டது,” என்று நிதி அமைச்சு தெரிவித்துள்ளது.
