ஷா ஆலம், நவ. 21- மாநிலத்தின் குறைந்தபட்ச சம்பள விகிதம் அடுத்த ஆண்டு 1,700 வெள்ளியாக சீரமைக்கப்படும். கூட்டரசு மட்டத்தில் மேற்கொள்ளப்படும் அமலாக்கத்திற்கு ஏற்ப இந்நடவடிக்கை எடுக்கப்படுகிறது.
அரசு நிறுவனங்கள் மற்றும் தனியார் துறை உள்ளிட்ட பங்களிப்பாளர்களின் ஒத்துழைப்புடன் இந்த அணுகுமுறை செயல்படுத்தப்படும் என்று மனிதவளத் துறைக்கான ஆட்சிக்குழு உறுப்பினர் வீ. பாப்பாராய்டு கூறினார்.
பொருளாதார நிலை மற்றும் பணவீக்க விகிதத்தை கருத்தில் கொண்டு நியாயமான மற்றும் பொருத்தமான ஊதியத்தை வழங்குவதை ஊக்குவிக்க சிறு, சிறு மற்றும் நடுத்தர நிறுவனங்களுக்கு மாநில அரசு நிர்வாகம் உதவிகளை வழங்கும் என்றும் அவர் விளக்கினார்.
மாநில அரசின் குத்தகைகளைப் பெறும் நிறுவனங்களும் இந்த நிபந்தனைக்கு இணங்குவது உறுதி செய்யப்படும். 1,700 வெள்ளியை குறைந்த பட்ச சம்பள முறையாக நடைமுறைப்படுத்துவதற்கு அனைத்து தரப்பினரின் தொடர் கண்காணிப்பும் ஒத்துழைப்பும் தேவை.
வளர்ச்சியடைந்த மற்றும் பொருளாதார மேம்பாட்டைக் கண்டு வரும் மாநிலம் என்ற முறையில் அரசு செயல்பாடுகளை பாதிக்காமல் மாற்றங்களை ஏற்படுத்துவதற்கான முயற்சிகள் முன்னெடுக்கப்படும். மேலும் தொழிலாளர்களுக்கு உரிமைகள் குறித்த பயிற்சியும் கல்வியும் வழங்கப்படுவதை உறுதி செய்யப்படும் என்று அவர் இன்று சிலாங்கூர் மாநில சட்டமன்றக் கூட்டத்தில் தெரிவித்தார்.
கடந்த மாதம் 2025ஆம் ஆண்டிற்கான மடாணி பட்ஜெட்டைத் தாக்கல் செய்த பிரதமர், அடுத்த ஆண்டு பிப்ரவரி ஒன்றாம் தேதி முதல் குறைந்தபட்ச ஊதிய விகிதத்தை மாதம் ஒன்றுக்கு 1,500 வெள்ளியிலிருந்து 1,700 வெள்ளியாக உயர்த்துவதாக அறிவித்தார்.
