கோலாலம்பூர், ஜூன் 7 - வாகனத் திருட்டில் ஈடுபட்டதாக சந்தேகிக்கப்படும் முன்னாள் குற்றவாளி ஒருவர், அதே குற்றத்திற்காக சிறைத்தண்டனை அனுபவித்து ஆறு மாதங்களுக்குப் பிறகு கடந்த ஞாயிற்றுக்கிழமை கைது செய்யப்பட்டார்.
சிராஸ், பூடு, ஸ்ரீ பெட்டாலிங் மற்றும் பேராக்கில் தெலுக் இந்தானைச் சுற்றியுள்ள எட்டு வாகனத் திருட்டு வழக்குகளின் விசாரணையில் உதவுவதற்காக 46 வயதான உள்ளூர் நபர் பிளாட் ஸ்ரீ சபாவில் தடுத்து வைக்கப்பட்டதாக சிராஸ் மாவட்ட காவல்துறைத் தலைவர் ஏசிபி முகமது இட்ஸாம் ஜாபர் கூறினார்.
கடந்த ஆறு மாதங்களாக செயல்பட்டதாக நம்பப்படும் சந்தேகநபர் குற்றவியல் மற்றும் போதைப்பொருள் குற்றங்கள் தொடர்பான பல முந்தைய பதிவுகளை வைத்திருந்ததாக சோதனையில் கண்டறியப்பட்டுள்ளது என்றார்.
"இந்தக் கைது நடவடிக்கையின் மூலம் நான்கு புரோட்டான் ஈஸ்வரா, இரண்டு புரோட்டான் சாகா, ஒரு நிசான் வானெட் வேன் மற்றும் ஒரு புரோட்டான் வீரா ஆகிய எட்டு வாகனங்கள் பறிமுதல் செய்யப்பட்டுள்ளன" என்று முகமது இட்ஸாம் இன்று சிராஸ் மாவட்ட காவல்துறை தலைமையகத்தில் செய்தியாளர் கூட்டத்தில் தெரிவித்தார்.
குற்றவியல் நடைமுறைச் சட்டத்தின் 117ஆவது பிரிவின் கீழ் விசாரணைகளுக்காக சந்தேகநபர் ஜூன் 9ஆம் திகதி வரை நான்கு நாட்கள் விளக்கமறியலில் வைக்கப்பட்டுள்ளார்.
குடியிருப்பு பகுதிகளுக்கு வெளியே தங்கள் வாகனங்களை நிறுத்துபவர்கள் வாகன திருட்டை தடுக்க கூடுதல் பூட்டுகளை நிறுவுமாறு முகமது இட்ஸாம் அறிவுறுத்தினார்.
இதுபோன்ற சம்பவங்கள் அல்லது பிற குற்றவியல் வழக்குகள் தொடர்பான தகவல்களை சிராஸ் மாவட்ட காவல்துறை தலைமையகத்தின் ஹாட்லைன் 03-92845050/5051 என்ற எண்ணில் அல்லது கோலாலம்பூர் போலீஸ் ஹாட்லைன், 03-2115999 அல்லது அருகிலுள்ள காவல் நிலையங்களைத் தொடர்புகொள்வதன் மூலம் காவல்துறைக்கு அனுப்பலாம்.
